മറവിയുടെ
ഒരു വേനലിനും കൊടുക്കാതെ
ഒരുപിടി ശംഖുപുഷ്പങ്ങള്
ഞാന് കാത്തു വച്ചു.
നിളാ നദിക്കിപ്പുറം
മഴവില്ലു വിരിയുന്ന സന്ധ്യയില്
അവ ഞാന് നിനക്കു നല്കി
തിരികെ നടക്കും.
അവ നിന്നോട്
തീ ചിറകുള്ള തേനീച്ചകളെ
കുറിച്ചു പറയും.
തേന് കവര്ന്നെടുത്ത
അവയുടെ പോക്കുവരവുകളെ കുറിച്ചും.
വിഷം വമിക്കുന്ന കൊമ്പു
കുത്തിയാഴ്ത്തിയ വേദനയെക്കുറിച്ചും.
തനിക്കേകിയ നഖക്ഷതങ്ങളെ
കുറിച്ചും പറയും.
പറയാന് ബാക്കി നിന്ന
പ്രണയത്തെ കുറിച്ച്,
അറുത്തുമാറ്റിയ വള്ളികളെ കുറിച്ച്,
പ്രണയ നീലിമയില് മയങ്ങിയ
നിലാവുള്ള രാവുകളെ
കുറിച്ചും പറയും .....
മുരുക്കില് പൂവുകള് ഉദിക്കുന്ന
ദിക്കുതേടി പോയ
എന്നെ കുറിച്ചും പറയും.
അവ നിന്നോട് ഇനിയും
പൂവുകള് പൂക്കുമെന്നും ....
മേഘങ്ങള്ക്ക് തീ പിടിക്കുമെന്നും പറയും
ഇടിവെട്ടി പിളരുന്ന
രാത്രികളില് അവയില്
അശാന്തമായ അക്ഷരങ്ങള് മുളക്കും
അവയുടെ സ്വരം അപരനു
സംഗീതമാകുന്ന കാലത്തിന്റെ
സ്വപ്നങ്ങളിലേക്ക്
അതിന്റെ വേരുകള് വളരും...
ദിലീപ് നെല്ലുള്ളിക്കാരന്
1 comments:
Post a Comment